Svar við því hvort fasteign sé haldin galla í skilningi laga sem seljandi ber ábyrgð á ræðst af heildarmati ýmissa þátta eins og eðli og umfangi gallans, atvikum í aðdraganda kaupa og upplýsingum sem seljandi veitti kaupanda um fasteignina.
Almenna reglan er sú að notuð fasteign geti aðeins talist gölluð að kostnaður við úrbætur gallans nemi að lágmarki 10% af kaupverði hennar þannig að svokölluðum gallaþröskuldi sé náð. Minniháttar frávik í gæðum og eðlilegt slit á notaðri fasteign eru því ekki ágalli samkvæmt reglum fasteignakauparéttar sem veitir rétt til vanefndaúrræða.
Frá þessu eru tvær undantekningar. Annars vegar þegar um er að ræða nýbyggingar eða nýlegar fasteignir, enda má kaupandi þá gera auknar kröfur um að fasteignin sé gallalaus.
Hins vegar á reglan um gallaþröskuld ekki við ef seljandi hefur veitt kaupanda rangar, ófullnægjandi eða villandi upplýsingar um fasteignina eða leynt upplýsingum sem máli skipta um ástand hennar – s.s. leka frá þaki eða ágreining við nágranna. Við slíkar aðstæður getur kaupandi átt rétt til vanefndaúrræða eins og afsláttar eða skaðabóta jafnvel þótt umfang gallans sé undir 10% viðmiði.
Kaupandi ber sönnunarbyrði fyrir því að fasteign hafi verið haldin galla fyrir afhendingu og að honum hafi ekki mátt vera gallinn ljós við skoðun í aðdraganda kaupa.
Hvernig aðstoðum við þig?
Fasteignagallamál eru oftast flókin og krefjast faglegrar meðferðar frá upphafi. LOCAL lögmenn hafa mikla reynslu af úrlausn mála sem snerta galla í fasteignum, hvort sem er fyrir kaupendur eða seljendur. Við veitum faglega og skýra ráðgjöf við mat á réttarstöðu aðila vegna galla, önnumst sáttaviðræður og aðstoðum með önnur nauðsynleg úrræði til að tryggja hagsmuni okkar viðskiptavina.
